Mama Tee Series -The Messer (Pidgin Post Alert)

Na for pidgin we go nack today own, if you no sabi pidgin, abeg fain person make he interprete for you.

The Saturday before the Saturday wen waka pass, fasting never begin that time. I follow some mama mama them for my area go one party for Badagry. 

Dem carry dat blue BRT bus wen get A/C come say make e move us go there.
I dress finish, con give one make-up artist #500 make she do make-up for me, all of una go sabi that make-up wen dem dey call "I wan comot", that first one wen dey for their price list. kikikikikikiki. I con nack koi-koi shoes and better perfume put.

Make we go back to the koko.

The other mamas dem con gather, we con line up dey enter inside bus one by one. My country people, as we tanda for line na so one kain dangerous smell nack my nose oh.

Make I tell una how the smell be. If fowl just born pikins, the remaining egg wen no obey, if something break am, una sabi the smell? Rotten egg. Na so this thing dey smell.

This endtime mess scatter the line, everybody con cover nose dey run. The woman wen dey carry us go the party con dey beg say make the messer of that mess go back to her house if she know say the mess still remain for her yansh. Hahahahhahaha

She kneel down dey beg oh, she say if the person mess that kain mess inside BRT bus, she go disgrace am.
Nobody gree go back oh. Everybody just do face kpakam.

I kukuma fain one seat wen near window put my yansh. If I smell anything I go open the window carry my nose put for outside make person no con kee me.

When we reach Mile 2, I don begin dey doze. Na so that messer discharge another nuclear weapon, chai Chineke meee! the smell vanish my sleep sharp sharp . Everywhere con scatter.

Oga pilot rush park the bus, he say make everybody come down. Na so we open all the windows con rush come down. Wen e reach like 10minutes, dem say make we enter inside again. As we enter siddon, the party woman com dey go round, she con dey tell people make dem stand up, she con put nose for their yansh dey smell am. She talk say she wan catch the messer. Lmao.

All of us support the level oh, the messer no try at all. We must to catch am.
As she reach one woman seat, she no gree stand up. Come see as this woman fat, sorry na curvy I been wan talk, she just balance for the seat like cow shit. Them con ask her whether na she dey mess. She say na she, make we no vex.

 Come see how we provoke dey insult her. She sef con provoke dey insult the party woman say "How you go dey smell person yansh? Na pikins we be for here? I senior you well well, person no fit mess again? Mess no get house, e no dey kill person, na poison?"

My country people, make una con see commotion! Even driver sef follow buy the matter.
Last last, Mrs Messer con vex go down.

My people Na so this matter take shele oh, the mess remove my perfume sef, the thing con dey smell one kain smell for my body. I no know say mess get power like this. Anyway, thank Baba God say we go there, return back to we area without no accident.

Hope say una enjoy my pidgin small, e don tey wen I write for pidgin, make una pardon any gbagaun.


Mama Tee

*Mess remove perfume?hahahahahahaha na fake perfume be that nah...better advice the messer go find who go can the mess use do rat poison...hehehehehehehhhe